Tagesablauf eines Rentners
Morgens wachsch ganz dubblich uff
ond gucksch nò an dein Blavo nuff.
Du denkscht, was send denn dees fir lange Schdangà,
ach so, dà duàt jà dr Vorhang hangà.
Aus am Bett willsch ausesprengà,
nò bleibsch mit am Fuàß an dr Bettdecke hengà.
Jetzt fliàgsch zom Bett naus, mit à mà Krach,
erscht jetzt bisch du so richtig wach!
Dr’ Kaffee schdòht scho uff am Tisch,
weil dei Frau scho vorher uffgschdandà isch.
Uff dr Tisch gucksch’d ganz vòrstohlà,
du muàsch doch erschd dei Zeitung holà,
aber z’erscht muàsch’de nò rasierà
ond den Schaum em G’sicht romschmierà,
Nà fahrsch rom, von obà ond von ondà.
dr Bart der isch jetzt endlich hondà.
D’Zeeh putzà , dees isch net so wichtig,
à Gläsle Schnaps des wär jetzt richtig.
Schnell nei ens Hemàt ond end’Hos
ond nò gòhts’s’Zeitungsholà los.
Em Nu be i wieder am Kaffeedisch,
der Kaffee isch sogar no frisch.
Zeitung, G’sälzbrot ond Kaffee,
wià isch des Kaffeetrenkà schee.
Nà schreibt mei Frau uff, was se braucht,
dass mir blos dr Kopf so raucht.
Jetzt nei en à andre Hos
ond zom Eikaufà, los.
Dr Einkauf, der war à Erlebnis,
des sieh i nò mit dem Ergebnis,
dass em Laden nebà drà,
mr noh viel billiger kaufen kà.
Beim Rechnà hann i nò bemerkt,
dass blos à Viertele mi stärkt.
Ond wie i sitz, am Wei mi labend,
ischs uf oimàl wieder Abend.
Em Fernseh kommt à großer Mischd,
dass i vor Wuàt so richtig schwitz.
Der Dag neigt sich seim Ende zuà
ond i han endlich jetzt mei Ruh.