Mae Opa war emmer druff aus, dass gschbaard wird wo’s bloß goht. Deshalb hen mir denkt, mir machat ehm a große Fraed, wenn mir ehm a Hoorschneidmascheena kaufad. Do heddad mir nämlich glei zwoi Mugga midd oim Baddschr gfanga: S’ Geld fir da Friseer wär gschbaard, on er miaßt au nemme den Abschdecher zum Schillers Walder en sae Boiz nocham Hoorschneida macha. Vor allem d Oma hodd do viel Wert druff glegt.
Deshalb hodd se au glei dui Azeig aus am Bläddle rausgschnidda ond a baar Dag schbäder des hochmoderne, ibor da Schällakenig globte Gerät bschdelld. Se hod gmoend, des wär beschdimmt a schees Weihnachtsgschenk fir onsern Opa.
Scho beim Auspagga am Heilig Obend sen die erschde Zweifl uffkomma, ob des Gschenk wirklich s’ Richtige fir da Opa isch.
Er hodds mid vorschieden Kommentar en Empfang gnomma ond gmoend, des sei nausgschmissas Geld ond däd jo doch nix dauga.
Am zwoeda Feiertag hann i ’s no schliaßlich nemme vorwarda kenna. Onder dem Vorwand, dass mr des Gerät ausprobiera soddad – zwecks dr Garantie – hodd sich dr Opa murrend gschlaga geba.
Zum Gligg isch der Apparat ohne Strom gloffa! Mor hodds bloß en ´d Hand nemma ond an zwoe Edelstahlhebl zammadrugga missa. Dia Messerla em ondra Doel von derra Mascheena hen d’ Hoor no wia von selber ra gschnidda. Buddrwoech. So isch’s jedenfalls en dr Gebrauchsaweisung gschdanda...
Kurz druff ischs no losganga. Dicht an dr Kopfhaut vom Opa fahr i midd dem Schlidda von dr Maschena entlang, während i dia Hebl feschd zammadrugg.
Die erschd Bah isch au prima ganga. Em Opa seine Hoor sen no so nausgchbriddsd, so dass I en Zagga zuaglegt ond a bissle forscher gschnidda han.
Noch etwa zwoi mol drugga, hodd dr Opa en Schroi nausglau ond glei druff gfluachd wie ein Rohrspatz:
„Weg do! Des ka doch ed sae, dass dees so ropfd! Weg mid!“
I han uff en naegschwäddsd wia uff en kranka Gaul, aber es war nix zu macha!
Dem Opa sei Kopf isch rom ond nomm gfahra ond seine wiaschde Fliach hen nedd grad zu derra Hendergrondmusigg von ra Weihnachdspladda bassd.
Zum Glick hodd sich des Schneidegerät so em Opa seine Hoor vorhoogd ghed, dass nedd nahaagla hodd kenna.
Irgendwann hodd sich no dui Maschena allerdings doch vom Opa sae ra Kopfhaut gloggerd.
Au, no isch’s aber erschd losganga...
Dr Opa hodd so guad wie i gwisst, dass er so nedd onder d Leit ka. Die anderthalb Bahna an seim Henderkopf heddad vielleicht en dr heidiga Zeid weniger Aufsäa erregt, aber Midde de Sechziger hodd mor so äbbas no nedd kennt.
Noch a baar Minuda, han i da Opa iborredad ghett, dass mir weider macha missad.
Mit jedem Schnitt, den dia Messerla do hen, han i bädded, dass sich jo kois me em Opa saem schdärcha Hoor vorfangd.
´S hodd scho no a baarmol gropft, aber ´s Greebschde war iborschdanda.
Zum Gligg hod dr Opa koen Schbiagl wella, zum sich von Henda adsgugga. ´S hodd scho a baar Schnitzer dren ghett, aber des han i fir mi bhalda.
D’ Oma hodd sich während derra Zeremonie en d’ Kiche vrzoga ghett ond isch jetzt au wieder en d’ Stub raekomma. Se hodd gwissd, dass sui jetzt da krönende Abschluss macha derf: Em Opa seine Nasalechr ond Ohrahoor schneida.
Ons war älle klar, dass dees heid a bsonders hoorige Sach werda wird