So wirst du Politiker
Erschd wird àmòl à Dommer g’suàcht
ond em Wahlbüra nò buàcht.
Du brauchschd blos fotogen zu sei
ond scho kommscht en ‚d Wahllischde nei.
Beim Fotograf wirsch nò fotografiert
ond Werbewirsam ausstaffiert,
Glei werded ‚d Wahlplakat nò druckd,
von dene mr nò ronderguckt.
Jetzt erschd wirsch du verständigt
ond dir s’Bardeibuàch ausgehändigt,
welche Bardei, isch doch egal,
dià saget nò, brobierschs hald mòl.
Schwetzà, schwetzà, des isch wichtig,
was d`d sechsch, des isch doch nichtig.
Redà schwingà, muàsch du kennà,
von oiner Versammlung zur adrà rennà,
hörà was dr d’Leit nò saget
ond du muàsch se mit viel Antwortà plògà.
Schwetz emmer om dr heisse Brei drom rom,
niemòls d’Wòred dagà, des wär domm.
Hosch du de mòl uff was vr’steift
ond d’Wähler richtig ei’gsoift,
mach dir dò drieber koine Sorgà,
vergessà hend diàs bereits scho Morgà.
Jetzt kommt die Wahl, lass di net lombà,
Geld, des dr no fehlt, duàsch oifach bombà,
denn dià, dià’s hend ond di nò wählàt,
weil se nòch dr Wahl ihr Geld nòchzehlàt,
damit ihr einsatz sich rendiert,
denn als Schbender, hent se di jò scho regiert.
Mit de Medià muàsch de jò guàt schdellà,
nò bisch emmer uff am Kamm dr Symbadiewellà.
Plötzlich kriàgsch’d nò an Minischderposchdà
ond den uff ander Leit’s Koschdà.
Ans Geld brauchschd nò nemme denkà,
lesch dr hald Diätà schenkà.
Dei Pensio kaaschd du dir sichàrà
ond leis nò dir ens Feuschdle kicherà.
So oifach ischs Politiker z’werdà,
bei älle Regierungà uff Erdà.